மாற்கு 5:34 அவர் அவளைப் பார்த்து: மகளே, உன் விசுவாசம் உன்னை இரட்சித்தது, நீ சமாதானத்தோடேபோய், உன் வேதனை நீங்கி, சுகமாயிரு என்றார். 12 வருட பெரும்பாடுள்ள பெண்தன்னிடம் இருந்த பணத்தை எல்லாம் செலவழித்தும் மருத்துவர்களால் அவளை சுகப்படுத்த முடியவில்லை. மிகுந்த மனவேதனையில் இருந்தபோது இயேசுவிடத்தில் போனால், அற்புதம் நடக்கும் என்று கேள்விப்பட்ட அந்த பெண் இயேசுவின் உடையை, வஸ்திரத்தின் ஓரத்தையாகிலும் தொட்டால் போதும் என்று விசுவாசத்தோடு வந்தால், அவரைத் தொட்டாள் அற்புதம் நடந்தது. இயேசு அந்த பெண்ணைப் பார்த்துச் சொன்னார் மகளே, உன் விசுவாசம் உன்னை இரட்சித்தது, நீ சமாதானத்தோடு போய், உன் வேதனை நீங்கி சுகமாய் இரு என்றார்.

பல வருடங்களுக்கு முன்பாக நாங்கள் பெங்களூர் பட்டணத்திற்கு ஊழியத்திற்காகபோய்க் கொண்டிருந்தபோது புதுசத்திரம் என்ற இடத்தில் போகும்போது எதிராக வந்த மணல் லாரி எங்கள் காரில் மோதி விட்டது, நாங்கள் தூக்கி எறியப்பட்டோம்.எனக்கு பலமான அடி கழுத்து எலும்பு உடைந்தது. அந்த வலி தாங்க முடியாமல் நான் மயக்கம் அடைந்தேன், சுயநினைவை இழந்தேன். சரீரத்தில் ஒரு சின்ன வலி, வேதனை வந்தாலே மனிதன் சுயநினைவை இழந்து விடுகிறான். ஆபóரேஷனுக்கு ஏன் மயக்க மருந்து கொடுக்கிறார்கள் வலி தெரியாமல் இருக்கத்தானே. ஆனால் தற்போது (பெயின் கில்லர்)வலி மாத்திரைகள் எடுத்தால், சாப்பிட்டால் கிட்னி பாதிப்படைகிறது என்று சொல்லுகிறார்கள். நம் சரீரத்தில் வலி வந்தால் எவ்வளவு வேதனையாக உள்ளது. ஆனால் இந்த உலகத்தில் அநேகர் எத்தனையோ வைத்தியம் பார்த்தும் வியாதி தீர்ந்த பாடு இல்லை, வலி வேதனை நீங்கவும் இல்லை என்று வேதனையில் துடிக்கிறார்கள்.

ஒரு சகோதரர் வெளிநாட்டில் வேலை செய்கிறார். இவருக்கு மூன்று பிள்ளைகள், இவர்கள் படிப்பு, எதிர்கால வாழ்க்கைக்காக வெளிநாட்டில் போய் கஷ்டப்பட்டு சம்பாதிக்கிறார்.ஆனால் இரண்டாவது மகள், அவள் விருப்பம் போல திருமணம் செய்து கொண்டு வீட்டை விட்டு வெளியேறினாள். அந்த தகப்பன் மனம் உடைந்து போனார் இவர்களுக்காகத் தானே நான் வெளிநாட்டில் கஷ்டப்படுகிறேன். இவள் இப்படி செய்து விட்டாளே என்று வேதனையில் துடித்தார். ஆம் நாமும் பிள்ளைகளைக் குறித்து ஒரு விருப்பம், திட்டம்வைத்திருப்போம்.ஆனால் அவர்கள் சுயமாய் முடிவெடுக்கிறார்கள்.வேதனை நிறைந்த உலகத்தில் வாழ்ந்து கொண்டிருக்கிறோம்

இயேசு சொன்னார் உலகத்தில் உங்களுக்கு உபத்திரவம் உண்டு என்று. நான் ஜெபித்து என்னத்தை கண்டேன், எதற்கு ஆண்டவரை நேசிக்க வேண்டும் என்று சாத்தான் ஒவ்வொருவரையும்திசை திருப்புகிறான், இருளுக்குள் நடத்துகிறான், வேதனையை பெருகப் பண்ணுகிறான். கர்த்தர் மேல் நம்பிக்கையை இழக்கச் செய்கிறான். என் அன்பு சகோதரனே, சகோதரியே நீங்கள் வேதனைப்படுவது தேவனுடைய விருப்பம் அல்ல. அவர் தாமே நம்முடைய பாடுகளை ஏற்றுக்கொண்டு, துக்கங்களை, வேதனைகளையும்அவர் சிலுவையில் சுமந்து தீர்த்து விட்டார். எனவே நம்முடைய வலி வேதனைகள் அவருக்குத் தெரியும்.எவ்வளவு உழைத்தும்குடும்பத்தை முன்னேற்ற முடியவில்லை, பொருளாதாரப் பிரச்சனை, பற்றாக்குறை உள்ளது, கடன் நெருக்கடி, சஞ்சலம் தான் என் வாழ்க்கையில் உள்ளது என்று நினைக்கிறீர்களா? கலங்காதீர்கள் தேவன் உங்கள் நிலையை மாற்றுவார். உங்கள் வலி வேதனை முற்றிலும் மாறும்.

யாத் 3:7-ல் அப்பொழுது கர்த்தர், எகிப்திலிருக்கிற என் ஜனத்தின் உபத்திரவத்தை நான் பார்க்கவே பார்த்து, ஆளோட்டிகளினிமித்தம் அவர்கள் இடுகிற கூக்குரலைக் கேட்டேன், அவர்கள் படுகிற வேதனைகளையும் அறிந்திருக்கிறேன்.இஸ்ரவேல் ஜனங்கள் 430 வருஷம் எகிப்திலே மிகவும் வேதனைப்பட்டார்கள். நல்ல சாப்பாடு கிடையாது,சம்பளம் கிடையாது, செங்கல் அறுக்க வேண்டும். மிகவும் நெருக்கப்பட்டார்கள் அவர்களுக்கு வாழ்க்கையே கசப்பானது. ஏன் வாழ வேண்டும் என்று நினைத்தார்கள். பார்வோனால் மிகவும் கொடுமைப்படுத்தப்பட்டார்கள். ஒரு வேதனை என்றால் ஒருவரோடு முடியவில்லை, அவர்கள் தலைமுறையே சேர்ந்து கஷ்டப்பட்டார்கள். இவர்களுடைய வேதனையை அறிந்த,பார்த்து விடுதலை தந்த தேவன், உங்களுடைய சரீர வலியா? மனவலியா? ஆத்துமா வலியா? எதுவாயிருந்தாலும் அதிலிருந்து உங்களை விடுதலையாக்குவார்.கர்த்தர் உபத்திரவபடுத்துகிறவர்களின் நிமித்தம், வட்டி வாங்குகிறவர்களின் நிமித்தம், ஒடுக்குகிறவர்களின் நிமித்தம் நீங்கள் இடுகிற கூக்குரலை கேட்டேன், நீங்கள் படுகிற வேதனையை அறிந்திருக்கிறேன் என்கிறார்.

நீங்கள் நினைக்கலாம் என் வேதனை யாருக்கும் தெரியலேயே, ஒரு மருத்துவர் வந்துமாத்திரைக்கு பதிலாக என் வேதனையை, வலியை சுமந்தால் நன்றாக இருக்கும் என்கிறீர்களா.யோபு 17:3-ல் அவர் சொல்லுகிறார் தேவரீர் என் காரியத்தை மேல் போட்டுக்கொண்டு, எனக்காகப் பிணைப்படுவீராக, வேறே யார் எனக்குக் கைகொடுக்கத்தக்கவர்?தேவரீர் எனக்காக பிணைக்கப்படுவீராக என்றும், எனக்கு உண்மை விட்டால் வேறு யாரும் இல்லை, நான் ஒரு அனாதை, நாடோடி, இந்த வலியை என்னால் தாங்க முடியவில்லை.கொப்பளங்கள் வெடித்து சிதறுகிறது. நீர் எனக்காகபிணைப்படுவீராக என்று யோபு கண்ணீரோடு ஜெபிக்கிறார். ஆண்டவர் அவர் வேதனையை மாற்றி, சிறையிருப்பை மாற்றினார். இன்றைக்கு அந்த தேவன் உங்கள் வேதனையை மாற்றுவார். உங்கள் வேதனை என்ன? ஏன் தூங்க முடியவில்லை, ஏன் இழப்பு, யாரை நம்பி இருக்கிறீர்கள். அவர்கள் உங்களை கைவிட்டு விட்டார்களா? சங்கீதக்காரன் சொல்லுகிறார் வேதனைப்பட்டேன் ஒடுங்கிப்போனேன் துக்கத்தோடு நாள்முழுவதும் திரிகிறேன் என்று சொல்லுகிறார். நம்முடைய வேதனைகளை, வலிகளை அவர் பார்த்துக்கிட்டேதான் இருக்கிறார். வேதனைப்படுகிறதற்கு ஒரு காலம் வந்தால், அந்த வேதனையை மறக்க ஒரு காலம் உண்டு.