சாத்தானின் வேலை உங்களை தேவனிடம் இருந்து பிரிப்பது தான். ஆதாமும் ஏவாளும் பகலின் குளிர்ச்சியான வேளையில் ஏதேன் தோட்டத்தில் உலாவுகிற தேவனின் சத்தத்தை கேட்பார்கள். நாள்தோறும் தேவனை பார்ப்பார்கள். நன்மையை மட்டும் பார்க்கட்டும் என்று தேவன் அவர்களை வைத்திருந்தார். ஆனால் அவர்கள் கர்த்தருடைய சத்தத்தை அசட்டை பண்ணி, சாத்தானின் சத்தத்தை கேட்டார்கள். அதனால் அவர்களுடைய சரீரப்பிரகாரமான கண் திறக்கப்பட்டு தேவ சாயலை இழந்து விட்டார்கள்.ஏதேன் தோட்டத்தை விட்டு ஆண்டவர் அவர்களை விரட்டி விட்டார். சிதறடிக்கப்பட்டு போய் விட்டார்கள்.இன்றைய காலக்கட்டத்தில் நாம் ஆராதனை செய்யலாம், பாட்டு பாடலாம், ஆனால் மிகவும் முக்கியமானது ஜெபம் பண்ணுவதும்.அந்த ஜெபத்தில் நிலைத்திருப்பதும் தான்.

ஆண்டவரிடம் இருந்து நம்மை பிரிப்பது எப்படி? மனைவியிடம் இருந்து கணவனை பிரிப்பது, கணவனிடம் இருந்து மனைவியை பிரிப்பது, பிள்ளைகளை எப்படி பெற்றோரிடம் இருந்து பிரிப்பது என்று சாத்தான் பல கன்னிகளை வைத்திருக்கிறான். சாத்தானுக்கு ஆண்டவர் பல பெயர்களை வைத்திருக்கிறார். சோதனைக்காரன், பொய்யன், திருடன், அசுத்த ஆவி, அசுத்தங்களை கொண்டு வருகிறவன் என்று, ஆனால் இன்னொரு வசனம் சொல்லுகிறது நாகூம் 2:1-ல் சிதறடிக்கிறவன் உன் முகத்துக்கு முன்பாக வருகிறான், அரணைக் காத்துக்கொள், வழியைக் காவல் பண்ணு, அரையைக் கெட்டியாய்க் கட்டிக்கொள், உன் பெலனை மிகவும் ஸ்திரப்படுத்து என்று.அவனுக்கு இன்னொரு பெயர் சிந்தனையை திசை திருப்புகிறவன். தேவன் நம்மை மன்னித்து திரும்பவும் அவருடைய கிருபைக்குள் கொண்டு வருகிறார். சிதறடிக்கிறவன் முன்பாக நம்மை காத்துக் கொள்ள நாம் கர்த்தரோடு இருக்க வேண்டும். ஆதாம் ஏவாளைப் போல நீங்கள் தேவனுடைய தோட்டத்திலிருந்து துரத்தப்படக்கூடாது. கர்த்தருக்கு முன்பாக நிற்க வேண்டும். இந்த ஜனத்தை எனக்காகவே ஏற்படுத்தினேன். இவர்கள் என்னுடையவர்கள். இவர்கள் என் பிள்ளைகள் என்று தேவன் சொல்லுகிறார். ஆகவே சிதறடிக்கிறவனக்கு நாம் நேரத்தை கொடுக்கக் கூடாது.

என்னைச் சிதறடிப்பதற்குப் பெருங்காற்றைப் போல் வந்தார்கள், சிறுமையானவனை மறைவிடத்திலே பட்சிப்பது அவர்களுக்குச் சந்தோஷமாயிருந்தது, நீர் அவனுடைய ஈட்டிகளினாலேயே அவனுடைய கிராமத்து அதிபதிகளை உருவக் குத்தினீர். ஆபகூக் 3:14. என்னை சிதறடிக்க காற்றை போல் என் மேல் வந்தார்கள். அப்படியே அவர்களை நீர் திருப்பி விட்டீர் என்று சொல்லபட்டிருக்கிறது. உங்களுக்கு விரோதமாய் வந்த சாத்தானின் ஆயுதங்கள் அவனுக்கே திரும்ப போகிறது. சிதறடிக்கிறவர்களுக்கு முன்னாடி நீங்கள்தோய்ந்து போக மாட்டீர்கள். நீங்கள் அவரோடு இருந்தால் அவர் உங்களுக்காக நிற்பார். உங்களுக்கு அற்புதம் செய்வார்.

அவர் திரளான ஜனங்களைக் கண்டபொழுது, அவர்கள் மேய்ப்பனில்லாத ஆடுகளைப்போலத் தொய்ந்துபோனவர்களும் சிதறப்பட்டவர்களுமாய் இருந்தபடியால், அவர்கள்மேல் மனதுருகி, தம்முடைய சீஷர்களை நோக்கி, அறுப்பு மிகுதி, வேலையாட்களோ கொஞ்சம் என்றார்,மத்தேயு 9:36,37. தொய்ந்து போனவர்கள் என்றால் உற்சாகம் இழந்து, நம்பிக்கை இழந்து போனவர்கள்என்று அர்த்தம். இனி நம்புவதற்கு எதுவும் இல்லை என்ற நிலையில் இருப்பவர்கள். நீங்கள் அவரோடு இருந்தால் உங்களுக்கு அநேக அற்புதங்கள் நடக்கும். நீங்கள் ஆண்டவரோடு இருப்பதற்கு ஒரே வழி அவருடைய சத்தத்தை கேட்டுக் கொண்டே இருக்க வேண்டும். மரித்தோர் தேவனுடைய சத்தத்தை கேட்கும் காலம் வருகிறது என்று வேதத்தில் சொல்லப்பட்டுள்ளது.

தம்முடைய புயத்தினாலே பராக்கிரமஞ்செய்தார், இருதய சிந்தையில் அகந்தையுள்ளவர்களைச் சிதறடித்தார். லூக்கா 1:51 ஆண்டவர் பேதுரு என்ற சீஷனிடம் உங்களில் ஒருவன் என்னை காட்டிக் கொடுப்பான். எல்லாரும் மறுதலித்து ஓடி போவீர்கள் என்றார்.அதற்கு பேதுரு எல்லாரும் உம்மை விட்டு ஓடினாலும் நான் உமக்காக என் உயிரையே கொடுப்பேன் என்றான். பேதுருவின் சிந்தையில் பட்டயத்தை பற்றிய ஒரு அகந்தை இருப்பதை சாத்தான் புரிந்து கொண்டான், மற்ற சீஷர்கள்இயேசுவை மறுதலிக்கவில்லை பேதுருவை மட்டும் மறுதலிக்க வைத்தான். நம்முடைய இருதயத்தில், சிந்தையில் அகந்தை உள்ளவர்களாக நாம் இருந்தால் சிதறடிக்கப்பட்டு போய் விடுவோம்.

அப்பொழுது, இயேசு அவர்களை நோக்கி, மேய்ப்பனை வெட்டுவேன், மந்தையின் ஆடுகள் சிதறடிக்கப்படும் என்று எழுதியிருக்கிறபடி, இந்த இராத்திரியிலே நீங்கள் எல்லாரும் என்னிமித்தம் இடறலடைவீர்கள். மத்தேயு 26:31 மேய்ப்பனை வெட்டும் போது ஆடுகள் ஓடிப்போய் விட்டன, சிதறடிக்கப்பட்டன. இப்படிப்பட்ட உலகத்தில் வாழ்கின்ற நீங்கள் சிதறடிக்கப்படாதபடி ஆண்டவர் உங்களை பாதுகாக்கிறார். கர்த்தர் உங்களை சிதறடிக்காதபடிக்கு அவர் எல்லைக்குள்ளே, அவர் பாதுகாப்புகுள்ளே வைத்திருக்கிறார். உங்கள் பிள்ளைகள் தவறான வழியில் போகாதபடி ஆண்டவர் காத்துக் கொள்வார். தேவனால் கூடாத காரியம் ஒன்றுமில்லை. நீங்கள் அவரோடு இருந்தால் சாத்தான் உங்களை சிதறடிக்க முடியாது.