அவர் திரும்ப வந்தபோது, அவர்கள் மறுபடியும் நித்திரைபண்ணுகிறதைக் கண்டார்; அவர்களுடைய கண்கள் மிகுந்த நித்திரைமயக்கம் அடைந்திருந்தபடியால், தாங்கள் மறுமொழியாக அவருக்குச் சொல்வது இன்னதென்று அறியாதிருந்தார்கள். மாற்கு 14:40

கெட்டதை நல்லதாக காட்டுகிறது தான் நித்திரை மயக்கம். அது கெட்டுப்போன உணவு, அது கெட்டுப்போன ராஜ்யம், ஆப்பிள் இதை தொடக்கூடாது என்பதை சாத்தான் இல்லை இதை நீ சாப்பிடு உன் கண்கள் திறக்கப்படும் என்று சொன்னபோதுஆதாம் தேவ கட்டளையை மீறினான், ஆதாமுக்குள், அவன் கண்ணில் ஒரு மயக்கம் வந்துவிட்டது. இன்றைக்கு நிறைய விபத்துக்கள் நடப்பதற்கு காரணம் என்னவென்றால் ஓட்டுநர்கள் தூங்கி விட்டதால் மாத்திரமல்ல அவர்கள் கண்கள் நித்திரை மயக்கத்தினால் நிறைந்திருப்பதும் தான். சிம்சோன் வாழ்க்கையை பாருங்கள் அவன் மகாபலசாலி,பெலிஸ்தியர் தேசத்தின் கதவுகளை தூக்கிக் கொண்டு நடந்தவன். இப்படிப்பட்ட பலசாலியாகிய அவன் தெ­லாள் என்ற பெண்ணின் மீது கண் மயக்கம் கொண்டு அவளை பார்த்தவுடன் அவன் வாழ்க்கை பரலோகம் போல அவனுக்கு தெரிகிறது.

வேதம் வாசிக்கவில்லை, ஜெபிக்கவில்லை என்றால் நம்முடைய உள்ளம் இருளடையும், உணர்வில்லாமல் போய்விடும். என் பிள்ளைகளுக்காக நான் வாழ வேண்டும், அவர்களை கரை சேர்க்க வேண்டும், அவர்களுக்கு செய்ய வேண்டிய காரியங்களை நான் சரியாக செய்ய வேண்டும் என்பதில் உங்களுக்கு உணர்வு இருக்கிறது, ஆனால் ஜெபம் செய்ய வேண்டும், வேதம் வாசிக்க வேண்டும், ஆண்டவர் இயேசுவுக்காக ஊழியம் செய்ய வேண்டும் என்பதில் மாத்திரம் உணர்வில்லாதவர்களாக இருக்கிறீர்கள். இதற்கு மாத்திரம் என் வீட்டில் உள்ளவர்களை நான் கேட்க வேண்டும், அவர்கள் அனுமதிக்க வேண்டும் என்று சொல்லுகிறீர்கள். சிம்சோன் தெ­லாள் என்ற பெண்ணை பார்த்தவுடன் கண் மயக்கம் உண்டாகி, அவள் அழகில் மயங்கினான். அவனுடைய இந்த மயக்க நிலையால் அவன் கண்கள் பறிபோனது, முடிவில் அவன் கண்களை இழந்தவனாக நின்றான்.

அப்போஸ்தலர் ஒன்பதாம் அதிகாரத்தில் ஆண்டவர் சவுலை பார்த்து சவுலே சவுலே நீ என்னை ஏன் துன்பப்படுத்துகிறாய் என்று கேட்டார். அதற்கு சவுல் தன்னை நீதிமானாக காண்பித்து, ஆண்டவரே நீர் யார் என்று கேட்கிறான். நான் யார் தெரியுமா? என்று தன் இருதயத்தில் பெருமிதம் கொள்ளும் போது, வானத்திலிருந்து ஒரு ஒளி அவன் மேல் வந்தது. அவன் கண்கள் பார்வையற்று, இருளடைந்தது. அவன் கண்களில் பார்வை பறிபோனது. ஆண்டவர் உங்களை சந்தித்தால் உங்கள் மனக்கண்களை திறந்து விடுவார், இல்லாவிட்டால் அது குருட்டாட்டமான கண்களாகத்தான் இருக்கும். இயேசுவோடு மூன்றரை வருடங்கள் கூடவே இருந்த சீஷர்கள் கூட இயேசு மரித்து உயிர்த்தெழுந்த பின்பு அவரைக் காணக்கூடாதபடிக்கு அவர்கள் கண்கள் மயக்க நிலையில் இருந்தது. அவர் யார் என்று கண்டுகொள்ள முடியாதபடிக்கு கண்கள் மூடப்பட்டிருந்தது. அப்பத்தை எடுத்து இயேசு அதை பிட்கிறபோது தான் அவர்கள் கண்கள் திறக்கப்பட்டது, போதகரே என்று சொல்லி அவரை அழைத்தார்கள். நாம் கண் தெரிகிறவர்கள் மாதிரிதான் இருக்கிறோம், ஜெபிக்கிறவர்கள் மாதிரி தான் இருக்கிறோம், நல்லா இருக்கிறவர்கள் மாதிரிதான் இருக்கிறோம், ஆனால் ஆண்டவருக்கு முன்பாக நாம் போய் நிற்கும் போது அவருடைய பிரசன்னத்தில் நிற்கும் போது தான் தெரியும் நாம் கண்கள் திறக்கப்பட்டவர்களா, கண் மூடப்பட்டவர்களா என்று.

எண்ணாகமம் 23 ஆம் அதிகாரத்தில் பிலேயாமை பாலாக் ராஜா இஸ்ரவேல் மக்களை சபிக்க அழைத்த போது ஆண்டவர் அவருடைய கண்களை திறந்தார். கழுதையை கொண்டு அவனோடு பேசினார். இறுதியாக அவன் சொல்லுகிறான் கண் திறக்கப்பட்டவன் சொல்லுகிறேன் என்று தன்னை சொல்லுகிறான். இன்றைக்கு ஆண்டவர் புத்தி மயக்கத்தில் இருக்கிற, கண் தெரியாத உங்களுக்கு, ஆவிக்குரிய கண்களைதிறந்து, பரலோகத்தை பார்க்க அந்த இடத்திற்கு செல்ல ஆண்டவர் உங்கள் கண்களை திறந்தால் தான் நீங்கள் பார்வை அடைய முடியும், புத்தி அடைய முடியும். இன்றைக்கு நாமும் ஆண்டவர் இடத்தில் நாம் பார்வையடைய வேண்டும் என்று கேட்போம். ஆண்டவர் நமக்காக ஆயத்தம் பண்ணி வைத்திருக்கிற சகல ஆசீர்வாதங்களையும் நாம் பார்க்கும்படிக்கு ஆண்டவரே இன்றைக்கு இந்த கண் மயக்கத்தில் இருந்து எனக்கு ஒரு விடுதலையை தாரும் என்று கேளுங்கள். என் கண்களைதிறந்தருளும் என்று கேளுங்கள். அவர் நம் கண்களை திறந்தால் தான் நம்மால் தெளிவாக பார்க்க முடியும். மோசே மரிக்கும்போது 120 வயது உள்ளவனாக இருந்தான், அவன் கண்களில் பார்வை குறையவே இல்லை, பார்வை மங்கவே இல்லை என்று வேதம் சொல்லுகிறது. ஆண்டவர் அவருடைய நாட்களுக்கு தக்க பலனை அவருக்கு கொடுத்தார்.

கர்த்தர் உங்களுடைய கண்களைத் திறந்தால் வசனம் உங்களுக்கு வழிகாட்டும், நான் உனக்குப் போதித்து நீ நடக்க வேண்டிய வழியை உனக்கு காட்டுவேன், உன் மேல் என் கண்ணை வைத்து உனக்கு ஆலோசனை சொல்லுவேன் என்று வார்த்தையின்படி நீங்கள் நடக்க வேண்டிய வழியை உங்களுக்கு போதிக்கும். இது தெரியாமல் நீங்கள் உங்கள் நம்பிக்கையை ஒரு ஊழியர் மீது வைக்கும் போது அது குறிசொல்லுதலாக மாறிவிடுகிறது. அது பிலேயாம் செய்தது போல் ஆகிவிடுகிறது. வெளிநாடுகளுக்கு நாங்கள் ஊழியத்துக்கு செல்லும்போது அங்குஅவர்கள் வேதம் கொண்டு வருவதில்லை, கண்களை மூடி ஜெபிப்பதில்லை, ஆனால் எங்களிடத்தில் ஜெபிக்க வரும்போது எங்களை குறித்து ஆண்டவர் உங்களிடத்தில் என்ன சொல்லுகிறார் என்பதை நீங்கள் ஜெபித்து எங்களுக்கு சொல்லுங்கள் என்று கேட்பார்கள். ஊழியம், ஜெபம் என்பது சோசியம் அல்ல என்பதை நீங்கள் புரிய வேண்டும்.

ஆகார்கண் மயக்கத்தில் இருந்தபோது அவ்வளவு பெரிய நீரூற்று அருகில் இருந்தும்அவளுக்கு தெரியவில்லை.கர்த்தர் நமக்காக உண்டு பண்ணி வைத்திருக்கிறதை நம் கண்கள் காணவில்லை, காதுகள் கேட்கவும் இல்லை, அது நம் மனதில் தோன்றவும் இல்லை என்று வேதம் சொல்கிறது. ஆகார் என் பிள்ளை சாகிறதை நான் பார்க்க முடியாது ஆண்டவரே என்று சொல்லி அழுது கண்ணீரோடு ஜெபித்த போது கர்த்தர் அவளுடைய கண்களில் இருக்கிற அந்த மயக்கத்தை எடுத்து போட்டு, கண்களில் தெளிவை தந்து நீரூற்றை காணும்படி செய்தார்.எனக்கு வேலை கிடைக்கவில்லை, திருமண நடக்கவில்லை, குழந்தை பாக்கியம் இல்லை என்று சொல்லி முறையிட்டுக் கொண்டிருக்கிறீர்கள்.ஆனால் ஆண்டவரிடத்தில் ஆயிரம் வழிகள் உண்டு, நீங்கள் அவரை தேடி அவருடைய சமூகத்திற்கு வந்தீர்களானால் அவர் அனைத்து ஆசீர்வாதங்களையும் உங்களுக்கு தருவார். என்னால் செய்யக்கூடாத அதிசயமான காரியம் ஒன்றுண்டே என்று தேவன் சொல்லுகிறார்.

இன்றைக்கு இந்த கண் மயக்கத்தில் இருந்து உங்களுக்கு விடுதலை தரப் போகிறார். ஆகையால் புத்தியில்லாத கலாத்தியரே எத்தனை நாட்களுக்கு தேவன் ஆயத்தம் பண்ணினதை, அவர் உண்டு பண்ணிவைத்திருக்கிறதை நீங்கள் புறக்கணித்துவிட்டு இருப்பீர்கள். இன்றைக்கு இந்த மயக்கத்தில் இருந்து தேவன் உங்களை விடுதலையாக்கப் போகிறார்.தேவன் உங்களுக்கு பயமுள்ள ஆவியை கொடாமல், பலமும், அன்பும் தெளிந்த புத்தியுமுள்ள ஆவியை தந்திருக்கிறார். ஒரு போராட்டம், ஒரு பிரச்சனை, ஒரு எதிர்ப்பு, ஒரு தடை வந்தால் நமக்கு இரண்டு மடங்கு மூளை வேலை செய்ய வேண்டும். இதற்கு ஒரே வழி பரத்திலிருந்து வருகிற ஞானம், கலப்படமில்லாத ஞானம், உன் எதிரி ஒருவரும் மேற்கொள்ளாத முடியாத ஞானம்,இந்த வல்லமையை உங்களுக்கும் இன்றைக்கு தந்து உங்களை அந்த மயக்கத்தில் இருந்து விடுதலையாக்குவார்.